ສຸດຍອດ..!! ຄອບຄົວລູງ ຄຳປີວ ແສນສຸລິຍະ ເຮັດກະເສດແບບປະສົມປະສານສ້າງລາຍຮັບຫຼາຍຕ່ຳກວ່າ 30 ລ້ານກີບ/ປີ.

ປັດຈຸບັນການປູກຝັງ-ລ້ຽງສັດໃຫ້ກາຍເປັນສີນຄ້າ ແມ່ນອີກທາງເລືອກໜື່ງ ຂອງປະຊາຊົນ ແລະ ຜູ້ປະກອບການ ທີ່ເປັນປັດໄຈສຳຄັນໃຫ້ແກ່ການພັດທະນາຊົນນະບົດ ແລະ ແກ້ໄຂຄວາມທຸກຍາກ ລວມທັງເປັນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ. ເຊິ່ງຍາມໃດຄະນະພັກ ອົງການປົກຄອງແຂວງສະຫວັນນະເຂດ ກໍ່ໄດ້ເອົາໃຈໃສ່ຊຸກຍູ້ສົ່ງເສີມປະຊາຊົນ ຈາກການຜະລິດແບບທຳມະຊາດ ໄປສູ່ການຜະລິດເປັນສີນຄ້າ ໂດຍນຳໃຊ້ເຕັກນິກວິທະຍາສາດ ແລະ ວິຊາການ ເຂົ້າໃນການປູກຝັງ-ລ້ຽງສັດ ໃຫ້ກາຍເປັນສີນຄ້າ.

ສຳລັບຄອບຄົວ ລູງ ຄຳປີວ ແສນສຸລິຍະ ອາຍຸ 68 ປີ ພະນັກງານບຳນານ ອະດີດຮອງຫົວໜ້າຫ້ອງການຖະແຫຼງຂ່າວ,ວັດທະນະທຳ ແລະ ທ່ອງທ່ຽວເມືອງເຊໂປນ ແຂວງສະຫວັນນະເຂດ ກໍ່ແມ່ນຄອບຄົວໜື່ງ ທີ່ໄດ້ຍຶດຖືເອົາການປູກຝັງ-ລ້ຽງສັດ ເປັນອາຊີບຕົ້ນຕໍພາຍຫຼັງທີ່ໄດ້ພັກຜ່ອນຮັບເບ້ຍບຳນານ ປັດຈຸບັນອາໄສຢູ່ບ້ານໂພໄຊ ເມືອງເຊໂປນ ແຂວງສະຫວັນນະເຂດ ເລີ່ມຕົ້ນທຳອິດລູງຄຳປີວ ໄດ້ກູ້ຢືມເງິນຈາກທະນາຄານນະໂຍບາຍຈຳນວນ 30 ລ້ານກີບ.

ເພື່ອລົງທຶນຊື້ໝູມາລ້ຽງ ເຫັນວ່າຜົນຕອບຮັບໄດ້ດີສົມຄວນເຊິ່ງສາມາດໃຊ້ໜີ້ທະນາຄານຈົນໝົດ ແລະ ສາມາດຊື້ລົດກະບະຮຸນໄດໄດ້ຄັນໜຶ່ງ ແລ້ວມາປັບແຕ່ງເປັນລົດໂດຍສານ ຫຼັງຈາກນັ້ນປີຕໍ່ມາກໍ່ໄດ້ປູກຢາງໂບງໃສ່ດິນສວນຈຳນວນ 4.000 ຕົ້ນ. ມາຮອດປັດຈຸບັນ ຄອບຄົວຂອງ ລູງ ຄຳປີວ ໄດ້ລ້ຽງງົວຈຳນວນ 24 ໂຕ,ລ້ຽງແບ້ 30 ໂຕ,ລ້ຽງໝູ,ລ້ຽງປາ ແລະ ສັດປີກອີກຈຳນວນໜຶ່ງ ເພື່ອຂາຍເປັນສິນຄ້າສ້າງລາຍຮັບພາຍໃນຄອບຄົວ ໂດຍສະເລ່ຍປີໜຶ່ງໆຄອບຄົວລູງ ຄຳປີວ ໄດ້ມີລາຍຮັບຈາກການຂາຍສັດລ້ຽງບໍ່ຕ່ຳກວ່າ 30 ລ້ານກີບ.

ລູງ ຄຳປີວ ຍັງເວົ້າອີກວ່າ: ຜ່ານການຫັນມາເຮັດກະເສດແບບປະສົມປະສານເປັນເວລາ 10 ກວ່າປີ ເຫັນວ່າຊີວິດການເປັນຢູ່ຂອງຄອບຄົວດີຂຶ້ນຫຼາຍ ເຊິ່ງສາມາດປຸກເຮືອນໄດ້ 2 ຫຼັງ,ປຸກຖຽງນາ 2 ຊັ້ນເຄິ່ງດິນ,ເຄິ່ງໄມ້ໄດ້ 1 ຫຼັງ,ຊື້ລົດໃຫຍ່ 2 ຄົນ ແລະ ສາມາດສົ່ງລູກຮຽນຈົບໃນດັບຕ່າງໆຕື່ມອີກ.

ສຳລັບບັນຫາທີ່ເກີດຂຶ້ນກັບຜົນຜະລິດໃນປັດຈຸບັນແມ່ນ: ຢາງໂບງທີ່ບໍ່ມີຕະຫຼາດຮັບຊື້ພາຍໃນເມືອງເຊໂປນ ໃນປັດຈຸບັນ ປູກມາແລ້ວບໍ່ມີບ່ອນຂາຍ ສະນັ້ນຈຶ່ງຮຽກຮ້ອງໃຫ້ອົງການຕັ້ງທີ່ກ່ຽວຂ້ອງຈົ່ງຊ່ວຍຊອກຫາຕະຫຼາດເກັບຊື້ຢາງໂບງນຳປະຊົນພາຍໃນເມືອງເຊໂປນຕື່ມ ເພາະຍັງມີສວນຢາງໂບງຂອງປະຊາຊົນອີກຫຼາຍຄອບຄົວທີ່ໄດ້ຮັບຜົນກະທົບ.

ພາບ – ຂ່າວ: ອັກສອນສິນ ພົມມະຈັນ#ສະຫວັນນະເຂດ #savannakhet #medialaos

Related Posts

Leave a Reply

Your email address will not be published. Required fields are marked *