ເອົາອອກດ່ວນ!!! ເຈົ້າໜ້າທີຈະລາຈອນເມືອງໄຊທານີ ເຂັ້ມງວດກວດກາລົດຕິດດອກໄຟສະປອດໄລ

ລະຫວ່າງວັນທີ 17-19 ສິງຫາ 2022, ກອງຕໍາຫຼວດຈະລາຈອນ ກອງບັນຊາການ ປກສ ເມືອງໄຊທານີ ນະຄອນຫຼວງວຽງຈັນ ລົງຕັ້ງຈຸດກວດກາຢູ່ 3 ຈຸດຄື: ເສັ້ນທາງເລກ 10 ເຂດບ້ານໄຮ່-ທ່າງ່ອນ, ເສັ້ນທາງ 450 ປີ ແລະ ເສັ້ນທາງເລກທີ 13 ໃຕ້ ເຂດຫຼັກ 18 ເພື່ອກວດກາລົດທີ່ຕິດດອກໄຟສະປອດໄລ ຫຼື ດອກແອວອີດີ, ຜ່ານການກວດກາຕົວຈິງໃນ 3 ວັນ ພົບລົດໃຫຍ່ທີ່ລະເມີດດ້ວຍການຕິດດອກໄຟສະປອດໄລ ຫຼື ດອກແອວອີດີໃສ່ໜ້າລົດ ແລະ ຫຼັງຄາລົດ ຈໍານວນ 60 ກວ່າຄັນ.

ພັຕ ສຸນີ ໄຊຍະວົງ ຮອງຫົວໜ້າພະແນກຕໍາຫຼວດ ຜູ້ຊີ້ນໍາກອງຕໍາຫຼວດຈະລາຈອນ ເມືອງໄຊທານີ ກ່າວຕໍ່ສື່ມວນຊົນ ປກສ ວ່າ:

ໂດຍປະຕິບັດຕາມແຈ້ງການຂອງ ກະຊວງໂຍທາທິການ ແລະ ຂົນສົ່ງ ແລະ ຂອງກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ ກ່ຽວກັບການນໍາໃຊ້ໄຟສະຫວ່າງ ແລະ ການຕິດຕັ້ງອຸປະກອນປະກອບຂອງຍານພາຫະນະທາງບົກ; ດັ່ງນັ້ນ, ກອງບັນຊາການ ປກສ ເມືອງໄຊທານີ.

ຈຶ່ງມອບໃຫ້ກອງຕໍາຫຼວດຈະລາຈອນເມືອງ ລົງຈັດຕັ້ງປະຕິບັດ ໂດຍການຕັ້ງຈຸດກວດກາຢູ່ຕາມເສັ້ນທາງພາຍໃນເມືອງ ໂດຍເລັ່ງໃສ່ກວດກາການດັດແປງສະພາບເຕັກນິກລົດ ເປັນຕົ້ນແມ່ນລົດໃຫຍ່ທີ່ດັດແປງໄຟຕາ, ຕິດດອກໄຟສະປອດໄລ ຫຼື ດອກແອວອີດີໃສ່ໜ້າລົດ ຫຼື ຫຼັງຄາລົດ.

ຜ່ານການລົງປະຕິບັດໜ້າທີ່ໃນ 3 ວັນຜ່ານມາ ພົບເຫັນຜູ້ລະເມີດຈໍານວນ 60 ກວ່າຄັນ, ຈໍານວນທີ່ລະເມີດນີ້ ເຈົ້າໜ້າທີ່ໄດ້ສຶກສາອົບຮົມ ແລະ ເຮັດບົດບັນທຶກກ່າວເຕືອນໃຫ້ປົດດອກໄຟສະປອດໄລ ຫຼື ເອວອີດີອອກ ພາຍໃນ 30 ວັນ, ຖ້າວ່າພວກເຮົາກວດກາພົບເຫັນໃນຄັ້ງຕໍ່ໄປ ຈະໃຊ້ມາດຕະການປັບໃໝຕາມລະບຽບກົດໝາຍວາງອອກຢ່າງເຂັ້ມງວດ; ນອກຈາກນີ້, ພວກເຮົາຍັງເຮັດໜ້າທີ່ໃນການກວດກາຍານພາຫະນະທີ່ບໍ່ຕິດປ້າຍທະບຽນ, ດັດແປງສະພາບເຕັກນິກລົດ, ບໍ່ເສຍຄ່າທໍານຽມທາງ, ບໍ່ກວດກາເຕັກນິກລົດ, ລົດບໍ່ມີເອກະສານ ແລະອື່ນໆ.

ໂອກາດດຽວກັນ, ພັຕ ສຸນີ ໄຊຍະວົງ ຍັງຮຽກຮ້ອງມາຍັງພະນັກງານ, ທະຫານ-ຕໍາຫຼວດ, ພໍ່-ແມ່ປະຊາຊົນຜູ້ໃຊ້ລົດ-ໃຊ້ຖະໜົນ ຢູ່ພາຍໃນເມືອງໄຊທານີ ຈົ່ງເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ ໂດຍສະເພາະ ແມ່ນການດັດແປງໄຟຕາລົດດ້ວຍການນໍາເອົາດອກໄຟສະປອດໄລ ຫຼື ດອກເອວອີດີມາຕິດໃສ່ລົດນັ້ນ ແມ່ນບໍ່ຖືກຕ້ອງຕາມລະບຽບ ເພາະເວລາສັນຈອນໄປ-ມາໃນຍາມຄໍ່າຄືນ.

ໄຟຕາລົດຂອງທ່ານອາດເຮັດໃຫ້ລົດຄັນອື່ນທີ່ຂີ່ສວນທາງກັບລົດຂອງທ່ານແນມບໍ່ເຫັນ ຫຼື ເຫຼື້ອມຕາ, ສ່ຽງຕໍ່ການເກີດອຸບັດຕິເຫດໄດ້ງ່າຍ; ສະນັ້ນ, ຫາກທ່ານໄດມີດອກໄຟສະປອດໄລຕິດຢູ່ໜ້າລົດ ຫຼື ຫຼັງຄາລົດ ບັນດາທ່ານຄວນປົດອອກ ເພື່ອບໍ່ເປັນການລົບກວນ ແລະ ສ້າງຄາມເດືອດຮ້ອນໃຫ້ແກ່ລົດຄັນອື່ນໆທີ່ຂີ່ສວນທາງມາ ແລະ ຍັງເປັນການປ້ອງກັນບໍ່ໃຫ້ລົດຄັນອື່ນ ຫຼື ລົດຂອງຕົນເອງເກີດອຸບັດຕິເຫດໃນຍາມຄໍ່າຄືນ.

Related Posts

Leave a Reply

Your email address will not be published.