ຈີນລົງໂທດເຈົ້າໜ້າທີ່ຝ່າຝືນກົດປະຢັດ ທັນວາເດືອນດຽວເກືອບ 20.000 ຄົນ ເຫດຟຸມເຟືອຍ-ຢຶດຖືລະບົບເຈົ້າຂຸນມຸນນາຍ.

ຈີນສັ່ງລົງໂທດເຈົ້າໜ້າທີ່ໃຊ້ຊີວິດຟຸມເຟືອຍ-ຢຶດຖືລະບົບເຈົ້າຂຸນມຸນນາຍ, ເດືອນທັນວາຜ່ານມາເດືອນດຽວເກືອບ 20.000 ຄົນ ຜົນຈາກການບັງຄັບໃຊ້ກົດປະຢັດເຂັ້ມງວດໃນຊ່ວງຫລາຍປີຜ່ານມາ.

ວັນທີ 29 ມັງກອນ 2022 ເວັບໄຊຊິນຮົວລາຍງານວ່າ: ໜ່ວຍງານຕໍ່ຕ້ານການສໍ້ລາດບັງຫລວງສູງສຸດຂອງຈີນປະກາດຜ່ານເວັບໄຊວ່າ: ໃນເດືອນທັນວາ 2021 ຈີນລົງໂທດເຈົ້າໜ້າທີ່ 19.489 ຄົນ ຂໍ້ຫາລະເມີດກົດລະບຽບ 8 ປະການ ວ່າດ້ວຍການຍົກລະດັບການດຳເນີນງານຂອງພັກ ແລະ ລັດຖະບານ.

ຄຳຖະແຫລງປະຈຳເດືອນຈາກຄະນະກຳມະການກວດສອບວິໄນສ່ວນກາງແຫ່ງພັກກອມມູນິດຈີນ (CCDI) ແລະ ຄະນະກຳມະການກວດສອບແຫ່ງຊາດ ລະບຸວ່າ: ເຈົ້າໜ້າທີ່ທີ່ຖືກລົງໂທດມີສ່ວນກ່ຽວຂ້ອງໃນຄະດີການລະເມີດກົດຈຳນວນ 13.431 ຄະດີ ແລະ ມີເຈົ້າໜ້າທີ່ໄດ້ຮັບໂທດທາງວິໄນ ຫລື ທາງປົກຄອງທີ່ກ່ຽວຂ້ອງກັບການຢຶດຖືລະບົບເຈົ້າຂຸນມຸນນາຍ, ການຢຶດຖືພິທີລີຕອງ ແລະ ພຶດຕິກຳທີ່ມຸ່ງແຕ່ຄວາມສຸກສະບາຍ ຫລື ພຶດຕິກຳທີ່ຟຸມເຟືອຍ ຈຳນວນ 13.806 ຄົນ.

ປີ 2021 ມີເຈົ້າໜ້າທີ່ລັດຖືກລົງໂທດຂໍ້ຫາລະເມີດກົດລະບຽບ 8 ປະການ ລວມ 150.362 ຄົນ ໂດຍກ່ຽວຂ້ອງກັບຄະດີຕ່າງໆ ລວມ 104.223 ຄະດີ ໃນຈຳນວນນີ້ ມີຜູ້ທີ່ໄດ້ຮັບໂທດທາງວິໄນ ຫລື ທາງປົກຄອງ 101.224 ຄົນ.

ໃນໄລຍະຫລາຍປີຜ່ານມາ, ຈີນໃຊ້ມາດຕະການເຂັ້ມງວດ ໂດຍມີເປົ້າໝາຍເພື່ອການປະຢັດ ຫລັງພົບວ່າມີເຈົ້າໜ້າທີ່ຈີນຈຳນວນບໍ່ໜ້ອຍໃຊ້ຊີວິດຟຸມເຟືອຍ ທັງໆທີ່ມີລາຍໄດ້ບໍ່ຫລາຍຈາກການເປັນເຈົ້າໜ້າທີ່ລັດ ໂດຍເມື່ອຫລາຍປີກ່ອນ ທາງການຈີນສັ່ງປິດສະໜາມກ໊ອບເກືອບ 200 ແຫ່ງ ແລະ ສັ່ງປິດອາຄານຂອງລັດທີ່ຖືກນຳໄປໃຊ້ຜິດປະເພດ.

ໂດຍໃນຕອນນີ້ ຈີນຍັງຢູ່ລະຫວ່າງການກຽມຊຸກຍູ້ຮ່າງກົດໝາຍປ້ອງກັນການຮັບປະທານອາຫານຢ່າງສິ້ນເປືອງ ລວມທັງສົ່ງເສີມການປະຢັດໃນຂະບວນການຈຳໜ່າຍ ແລະ ບໍລິໂພກອາຫານນຳອີກ.

Related Posts

Leave a Reply

Your email address will not be published.