ຫຸ້ນ ໂມເດີນາ ປັບຂຶ້ນ ຫຼັງຂ່າວວັກແຊັງເຂັມ 3 ກະຕຸ້ນພູມຄຸ້ມກັນເພີ່ມຂຶ້ນ 37 ເທົ່າ

ລາຄາຫຸ້ນຂອງບໍລິສັດໂມເດີນາ ປັບເພີ່ມຂຶ້ນ ຫຼັງຈາກທີ່ບໍລິສັດເປີດເຜີຍວ່າ ການສັກວັກຊີນເຂັມທີ 3 ຂອງໂມເດີນາ ຈະຊ່ວຍກະຕຸ້ນພູມຄຸ້ມກັນໄດ້ສູງເຖິງ 37 ເທົ່າ ສາມາດປ້ອງກັນເຊື້ອໄວຣັສກາຍພັນໂອໄມຄຣອນໄດ້.

ທັງນີ້ ບໍລິສັດໂມເດີນາເປີດເຜີຍວ່າ ການສັກວັກຊີນຍີ່ຫໍ້ໂມເດີນາ ເຂັມທີ 3 ຂະໜາດ 50 ໄມໂຄຣກຣາມຈະຊ່ວຍໃຫ້ຮ່າງກາຍສ້າງແອນຕີບໍດີຕ້ານໄວຣັສໂອໄມຄຣອນເພີ່ມຂຶ້ນ 37 ເທົ່າ ເມື່ອທຽບກັບການສັກພຽງ 2 ເຂັມ ແລະ ຖ້າຫາກວ່າ ສັກເຂັມທີ 3 ໃນປະລິມານ 100 ໄມໂຄຣກຣາມ ຈະຊ່ວຍເພີ່ມພູມຄຸ້ມກັນຕ້ານທານກັບໂອໄມຄຣອນເຖິງ 83 ເທົ່າ.

ທັງນີ້ ບໍລິສັດໂມເດີນາ ໄດ້ທົດລອງສັກວັກຊີນເຂັມທີ 3 ຂະໜາດ 50 ໄມໂຄຣກຣາມ ແລະ 100 ໄມໂຄຣກຣາມ ໃຫ້ອາສາສະໝັກກຸ່ມລະ 20 ຄົນ (50 ໄມໂຄຣກຣາມ 20 ຄົນ ແລະ 100 ໄມໂຄຣກຣາມ 20 ຄົນ) ຫຼັງຈາກຜ່ານໄປ 29 ວັນຈຶ່ງມາວັດແທກຄ່າແອນຕີບໍດີ ປາກົດວ່າ ຂຶ້ນຕາມຂໍ້ມູນທີ່ກ່າວມາຂ້າງເທິງນັ້ນ.

ບໍລິສັດໂມເດີນາ ຍັງເປີດເຜີຍວ່າ ບໍລິສັດກຳລັງພັດທະນາວັກຊີນປ້ອງກັນສາຍພັນໂອໄມຄຣອນໂດຍສະເພາະ ໂດຍຄາດວ່າຈະເລີ່ມທົດລອງກັບມະນຸດໃນຕົ້ນປີ 2022.

ຫຼັງຈາກຂ່າວດັ່ງກ່າວອອກມາ ເຮັດໃຫ້ຫຸ້ນຂອງບໍລິສັດເພີ່ມຂຶ້ນຢ່າງໄວວາໂດຍການຊື້-ຂາຍໃນເວລາ 20:40 ໂມງຂອງວັນທີ 20 ທັນວາຜ່ານມາ ປັບຂຶ້ນ 7,53% ສູ່ລະດັບ 317,50 ໂດລາສະຫະລັດ/ຫຸ້ນ ເຊິ່ງເປັນການເພີ່ມຂຶ້ນທີ່ສວນທາງກັບຕະຫຼາດ ທີ່ກຳລັງວິຕົກກັງວົນກ່ຽວກັບການແຜ່ລະບາດຂອງສາຍພັນໂອໄມຄຣອນຢູ່ໃນຂະນະນີ້.

Related Posts

Leave a Reply

Your email address will not be published. Required fields are marked *