ເປີດແລ່ນລົດໄຟໂດຍສານ ແລະຂົນສົ່ງສິນຄ້າ ຖ້ຽວປະຖົມມະເລີກ

ຂປລ. ພາຍຫລັງສຳເລັດພິທີ ເປີດນຳໃຊ້ລົດໄຟລາວ-ຈີນຂະບວນລ້ານຊ້າງ ແລະ ຂະບວນແຄນລາວ ສຳເລັດຢ່າງເປັນທາງການແລ້ວ ທ່ານ ພັນຄຳ ວິພາວັນ ນາຍົກລັດຖະມົນຕີ, ພ້ອມດ້ວຍພັນລະຍາ ແລະ ການນຳຂັ້ນສູງ, ອະດີດການນຳຂັ້ນສູງພັກ, ລັດ, ໄດ້ໃຫ້ກຽດຂຶ້ນຂີ່ລົດໄຟ ຂະບວນລ້ານຊ້າງ ຄັ້ງປະຖົມມະເລີກ.

ເປີດນຳໃຊ້ລົດໄຟ ລາວ-ຈີນ ຢ່າງເປັນທາງການ ໂດຍໄດ້ເຄື່ອນອອກຈາກສະຖານີລົດໄຟນະຄອນຫລວງວຽງຈັນ ເດີນທາງໄປຢ້ຽມຊົມສະຖານີລົດໄຟວັງວຽງ ແຂວງວຽງຈັນ, ໂດຍໄດ້ຮັບການຕອນຮັບຈາກການນຳຂັ້ນສູງຂອງແຂວງ.

ສຳລັບໄລຍະເວລາ ໃນການເດີນທາງຈາກສະຖານີລົດໄຟນະຄອນຫລວງວຽງຈັນ ຫາສະຖານີລົດໄຟວັງວຽງ ແຂວງວຽງຈັນ ໃຊ້ເວລາປະມານ 50 ນາທີ, ສ່ວນລາຄາປີ້ຂົນສົ່ງຜູ້ໂດຍສານ ຈາກສະຖານີນະຄອນຫລວງ (ນວ) ຮອດສະຖານີໂພນໂຮງ ລາຄາ ທຳມະດາ 40 ພັນກີບຕໍ່ຄົນຕໍ່ຖ້ຽວ,

ຊັ້ນ 2 ລາຄາ 56 ພັນກີບຕໍ່ຄົນຕໍ່ຖ້ຽວ, ຊັ້ນ1 ລາຄາ 86 ພັນກີບຕໍ່ຄົນຕໍ່ຖ້ຽວ, ນວ-ວັງວຽງ ລາຄາທຳມະດາ 74 ພັນກີບຕໍ່ຄົນຕໍ່ຖ້ຽວ, ຊັ້ນ2 ລາຄາ 103.000 ກີບຕໍ່ຄົນຕໍ່ຖ້ຽວ, ຊັ້ນ1 ລາຄາ 164.000 ກີບຕໍ່ຄົນຕໍ່ຖ້ຽວ, ນວ-ຫລວງພະບາງ ລາຄາທຳມະດາ 140.000 ກີບຕໍ່ຄົນຕໍ່ຖ້ຽວ, ຊັ້ນ2 ລາຄາ 198.000 ກີບຕໍ່ຄົນຕໍ່ຖ້ຽວ, ຊັ້ນ1 ລາຄາ 313.000 ກີບຕໍ່ຄົນຕໍ່ຖ້ຽວ,

ນວ-ເມືອງໄຊ ລາຄາທຳມະດາ 198.000 ກີບຕໍ່ຄົນຕໍ່ຖ້ຽວ, ຊັ້ນ2 ລາຄາ 279.000 ກີບຕໍ່ຄົນຕໍ່ຖ້ຽວ, ຊັ້ນ1 ລາຄາ 443.000 ກີບຕໍ່ຄົນຕໍ່ຖ້ຽວ, ນວ-ບໍ່ເຕ່ນ ລາຄາທຳມະດາ 238.000 ກີບຕໍ່ຄົນຕໍ່ຖ້ຽວ, ຊັ້ນ2 ລາຄາ 333.000 ກີບຕໍ່ຄົນຕໍ່ຖ້ຽວ, ຊັ້ນ1 ລາຄາ 529.000 ກີບຕໍ່ຄົນຕໍ່ຖ້ຽວ. ຢ່າງໃດກໍ່ຕາມຜູ້ໂດຍສານທີ່ຈະມາໃຊ້ບໍລິການລົດໄຟລາວ-ຈີນ,

ຕ້ອງມາຮອດສະຖານີລົດໄຟກ່ອນ 1 ຊົ່ວໂມງ ກ່ອນລົດໄຟຈະອອກ, ໃຊ້ປີ້ເປັນບ່ອນອີງ ເພື່ອເຂົ້າໃນສະຖານີ.

ສຳລັບກົດລະບຽບໃນການຂຶ້ນລົດໄຟ ຜູ້ໂດຍສານຕ້ອງຖືປີ້ລົດໄຟ, ມີໃບຢັ້ງຢືນການສັກວັກຊິນ 2 ເຂັ້ມຄົບຕາມກຳນົດ ແລະ ໃບຢັ້ງຢືນການກວດໂຄວິດ-19 ພາຍໃນ 72 ຊົ່ວໂມງ ຈຶ່ງສາມາດຂຶ້ນລົດໄຟໄດ້ (ຕ້ອງຖືເອກະສານຕິດຕົວ ທີ່ມີຜົນບັງຄັບໃຊ້, ເພື່ອນຳໃຊ້ຢັ້ງຢືນຕົວຕົນໃຫ້ກົງກັບໃບເອກະສານຢັ້ງຢືນການກວດໂຄວິດ).

ຂ່າວ: ທະນູທອງ ພາບ: ຂັນໄຊ

Related Posts

Leave a Reply

Your email address will not be published.