ຢາກເປີດປະເທດໄດ້ໄວໆຕ້ອງສັກວັກຊິນ ໃຫ້ບັນລຸ 70% ແລະ ກຽມພ້ອມດ້ານຕ່າງໆ

ທ່ານ ​ຣັດຕະນະໄຊ ເພັດສຸວັນ​ ຫົວໜ້າກົມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ ເມື່ອບໍ່ດົນມານີ້ ທີ່ກະຊວງດັ່ງກ່າວວ່າ: ປັດຈຸບັນກະແສເປີດປະເທດກຳລັງເປັນປະເດັນຫຼາຍໃນປະເທດທົ່ວໂລກ ກໍຄື ປະເທດໃກ້ຄຽງ ແລະ ລວມທັງປະເທດຂອງພວກເຮົາ.

ມີຫຼາຍປະເທດທີ່ອັດຕາການສັກຢາວັກຊິນປ້ອງກັນໂຄວິດ-19 ໄດ້ 70-90% ແມ່ນເລີ່ມເປີດປະເທດ ແຕ່ດ້ວຍເງື່ອນໄຂຕ່າງໆທີ່ຜູ້ຄົນເຂົ້າມາຈະຕ້ອງໄດ້ປະຕິບັດຕາມຢ່າງເຄັ່ງຂັດ, ເປັນຕົ້ນການກວດຊອກຫາເຊື້ອໂຄວິດ ພາຍໃນ 72 ຊົ່ວໂມງ, ການສັກວັກຊິນຄົບ, Roadmap ຂອງການເຂົ້າ ມາຢ່າງຊັດເຈນ,

ນັກວິຊາການຫຼາຍທ່ານແມ່ນໄດ້ຍົກຫົວຂໍ້ທີ່ກຳລັງຮິດໃນປັດຈຸບັນຄື: “ການຢູ່ຮ່ວມກັບພະຍາດ ໂຄວິດ-19” ຊຶ່ງວ່າເຮົາຈະຢູ່ນໍາມັນຢ່າງປອດໄພໄດ້ແນວໃດ? ແລະ ເງື່ອນໄຂກ້າວໄປສູ່ການເປີດປະເທດພວກເຮົາ ຕ້ອງມີຄວາມກຽມພ້ອມແນວໃດ? ພວກເຮົາຮັບຮູ້ນຳກັນວ່າເກືອບຈະເຂົ້າ 2 ປີ ທີ່ທົ່ວໂລກຍັງປະເຊີນໜ້າກັບ ການ ລະບາດຂອງພະຍາດໂຄວິດ-19 ຢູ່ ແລະ ບໍ່ມີທ່າອ່ຽງວ່າຈະຢຸດຕິ.

ແຕ່ສິ່ງທີ່ພວກເຮົາຮຽນຮູ້ນຳມັນຄືຖ້າໄດ້ ຮັບວັກຊິນປ້ອງກັນຄົບ ໂອກາດການຕິດເຊື້ອ ຫຼື ການເສຍຊີວິດ ເມື່ອສົມທຽບໃສ່ຜູ້ທີ່ບໍ່ທັນໄດ້ຮັບແມ່ນຕໍ່າຫຼາຍ. ດັ່ງທີ່ພວກເຮົາໄດ້ຮັບຮູ້ແຕ່ລະມື້ ການເສຍຊີວິດແມ່ນເກີດຂຶ້ນສ່ວນຫຼາຍໃນຜູ້ທີ່ສູງອາຍຸ ແລະ ມີພະຍາດປະຈຳໂຕ ບໍ່ວ່າທົ່ວໂລກ ຫຼື ໃນປະເທດຂອງພວກເຮົາ ແລະ ການສູນເສຍຂອງກຸ່ມຄົນເຫຼົ່ານີ້ ເປັນສິ່ງທີ່ສັງຄົມຍອມຮັບບໍ່ໄດ້

ເພາະເປັນບຸກຄົນທີ່ອາດຈະເປັນພໍ່ເຖົ້າ, ແມ່ເຖົ້າ, ພໍ່ປູ່ແມ່ຍ່າ, ພໍ່ແມ່ ແລະ ຜູ້ທີ່ເຮົາເຄົາລົບນັບຖື ແລະ ຍາດທາງໃກ້ ຫຼື ໄກ. ໃນບັນດາປະເທດທີ່ເປີດປະເທດ ຫຼື ຍອມຢູ່ຮ່ວມນຳໂຄວິດ ລ້ວນແຕ່ມີອັດຕາການສັກຢາປ້ອງກັນໂຄວິດສູງ ແລະ ລວມທັງກຸ່ມສ່ຽງ.

ແຕ່ບັນດາປະເທດເຫຼົ່ານັ້ນ ກໍຍັງຕ້ອງປະຕິບັດມາດຕະການປ້ອງກັນຕົນເອງຄືເກົ່າເຊັ່ນ: ການໃສ່ຜ້າປິດປາກ, ການຮັກສາໄລຍະຫ່າງ​ ແລະ ລະບົບການບໍລິການສາທາລະນະສຸກແມ່ນມີຄວາມກຽມພ້ອມ ຄືສາມາດຮອງຮັບກໍລະນີໜັກທີ່ຕ້ອງການຊ່ວຍເຫຼືອທາງການແພດໄດ້. ເຖິງຢ່າງໃດກໍຕາມປະເທດເຫຼົ່ານັ້ນຍັງ ສາມາດກັບຄືນນຳໃຊ້ມາດຕະການປິດເມືອງຖ້າເຫັນວ່າໂຕເລກຕິດເຊື້ອໃໝ່ຫາກເພີ່ມຂຶ້ນເກີນເສັ້ນເຕືອນໄພ.​

ສຳລັບ ສປປ ລາວ ພວກເຮົາມາເບິ່ງຄວາມກຽມພ້ອມມີແນວໃດ? ປັດຈຸບັນອັດຕາການສັກຢາທົ່ວປະເທດແມ່ນສັກເຂັມທີ 1 ໄດ້ 3.476.846 (ອັດຕາປົກຄຸມ 47,​38%) ແລະ ເຂັມ 2 ໄດ້ 2.936.022 (ອັດຕາປົກຄຸມ 40,​01%).

ຖ້າເບິ່ງລົງເລິກແຕ່ລະກຸ່ມເປົ້າໝາຍຈະເຫັນວ່າອັດຕາການສັກຢາ ໃນກຸ່ມແພດແມ່ນ 70%; ກຸ່ມສູງອາຍຸພຽງ 60% ແລະ ຜູ້ມີພະຍາດປະຈຳໂຕ 86,​5%. ດັ່ງນັ້ນ, ຖ້າພວກເຮົາຢາກເປີດປະເທດ, ມີຄວາມຈໍາເປັນທີ່ຈະຕ້ອງໄດ້ເລັ່ງ ການສັກວັກຊິນໃຫ້ບັນລຸເປົ້າໝາຍ 70% ແລະ ສະຖານທີ່ການບໍລິການສາທາລະນະຕ້ອງມີມາດຕະການປ້ອງ ກັນທີ່ດີຮັດກຸມເຊັ່ນ: ກັ່ນກອງອຸນຫະພູມ, ມີເຈວລ້າງມື.

ທຸກຄົນຕ້ອງຕິດຕັ້ງແອັບລາວສູ້ໆ, ທຸກຄົນທີ່ເຮັດວຽກ ໃນຂົງເຂດການບໍລິການແມ່ນຕ້ອງໄດ້ສັກຢາ 100% ແລະ ຕ້ອງມີກົນໄກກວດກາມາດຕະຖານຂອງສະຖານທີ່ ຕ່າງໆສາມາດເປີດບໍລິການໄດ້ ແຕ່ຕ້ອງປອດໄພສູງສຸດ ແລະ ທຸກຄົນຕ້ອງໄດ້ຕື່ນຕົວນຳກັນໃນການປ້ອງກັນ ຕົນເອງດັ່ງທີ່ໄດ້ປະຕິບັດໃນໄລຍະຜ່ານມາ ແລະ ການເປີດແມ່ນທັງເຮັດ ແລະ ຖອດຖອນບົດຮຽນເທື່ອລະກ້າວ ເພື່ອດັດປັບມາດຕະການຕ່າງໆໃຫ້ແທດເໝາະຕາມສະພາບການຄວາມເປັນຈິງ.

(ຂ່າວ-ພາບ: ວັນເພັງ)

Related Posts

Leave a Reply

Your email address will not be published. Required fields are marked *