ເຂົ້າໃຈຕື່ມຄວາມໝາຍກ່ຽວກັບບ້ານທີ່ຖືກກຳນົດເປັນບ້ານແດງ

ທ່ານ ດຣ ຄຳໃສ ເດດລືໄຊ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ລາຍງານໃນວັນທີ 19 ຕຸລາ 2021 ວ່າ: ໃນແຕ່ລະມື້ໄດ້ມີລາຍງານບ້ານແດງໃໝ່ໃນຫລາຍແຂວງ ດັ່ງນັ້ນຈຶ່ງຂໍອະທິບາຍຄວາມໝາຍຂອງບ້ານແດງໃຫ້ບັນດາທ່ານໄດ້ເຂົ້າໃຈຕື່ມ.

ບ້ານແດງ ໝາຍເຖິງບ້ານທີ່ມີການລາຍງານຜູ້ຕິດເຊື້ອຢ່າງໜ້ອຍ 1 ຄົນ ທີ່ບໍ່ສາມາດລະບຸແຫລ່ງທີ່ມາຂອງການຕິດເຊື້ອໄດ້ ຫລື ບໍ່ມີປະຫວັດເຊື່ອມໂຍງກັບຄົນອື່ນໆ ຫລື ການຕິດເຊື້ອແບບເປັນຈຸ້ມ ຫລື ມີການລາຍງານ 2 ຄົນຂື້ນໄປໃນໄລຍະ 14 ວັນທີ່ຜ່ານມາ.

ຫລາຍບ້ານ ທີ່ກາຍເປັນບ້ານແດງ ແມ່ນຈະມີປ້າຍບອກ ເພື່ອໃຫ້ປະຊາຊົນຄົນອື່ນຮັບຊາບວ່າ ນີ້ແມ່ນບ້ານແດງພ້ອມທັງມີເຈົ້າໜ້າທີ່ເວນຍາມຕະຫລອດ 24 ຊົ່ວໂມງ.

ໂດຍທົ່ວໄປແລ້ວ ເມື່ອບ້ານໃດໜຶ່ງຖືກກໍານົດວ່າເປັນບ້ານແດງ ບ້ານດັ່ງກ່າວຈະຕ້ອງໄດ້ປະຕິບັດມາດຕະການປິດບ້ານ ບໍ່ໃຫ້ຄົນພາຍນອກເຂົ້າມາໃນບ້ານ ເພື່ອປ້ອງກັນການແພ່ເຊື້ອ ຍົກເວັ້ນທິມແພດ ທີ່ມາເຮັດວຽກກ່ຽວຂ້ອງກັບພະຍາດໂຄວິດ-19. ສວ່ນປະຊາຊົນທຸກຄົນທີ່ຢູ່ບ້ານແດງ ຄວນປະຕິບັດເຊັ່ນນີ້:

– ເຂົ້າໃຈຕື່ມຄວາມໝາຍກ່ຽວກັບບ້ານທີ່ຖືກກຳນົດເປັນບ້ານແດງ

ຕ້ອງໄດ້ພ້ອມໃຈກັນຢູ່ເຮືອນບໍ່ອອກຈາກບ້ານ ແລະ ບໍ່ຄົບຄົນອື່ນ.

ບໍ່ອະນຸຍາດໃຫ້ການຈັດງານສັງສັນ ຊຸມແຊວໃດໆ.ຊາວບ້ານ ບ້ານແດງ ແມ່ນຕ້ອງໄດ້ປົກປ້ອງຕົນເອງເປັນພິເສດ ແລະ ເຂັ້ມງວດ ໂດຍການໃສ່ຜ້າປິດປາກ-ດັງ, ໝັ່ນລ້າງມື, ຢູ່ຫ່າງກັນ ຢ່າງໜ້ອຍ 1 ແມັດຂື້ນໄປ ແລະ ສະມາຊິກຄອບຄົວ ຄວນແຍກກັນກິນເຂົ້າ ກິນໃຜກິນມັນ.

ໃຫ້ການຈັດຕັ້ງບ້ານຮັບຜິດຊອບໃນການຊ່ວຍຈັດຊື້ເຄື່ອງອຸປະໂພກ, ບໍລິໂພກໃຫ້ແກ່ຄອບຄົວ ຫລື ເຮືອນທີ່ມີຜູ້ຕິດເຊື້ອ ຖ້າມີພະນັກງານ-ລັດຖະກອນ ສັງກັດຢູ່ບ້ານແດງ ດີທີ່ສຸດ ຄວນຢຸດໄປເຮັດວຽກຢູ່ຫ້ອງການຊົ່ວຄາວ ແຕ່ເລືອກວິທີເຮັດວຽກຢູ່ເຮືອນແທນ.ສໍາລັບບາງໜ້າວຽກທີ່ຂາດບໍ່ໄດ້ ຕ້ອງເຮັດຢູ່ຫ້ອງການເທົ່ານັ້ນ ກໍຄວນຈະໄດ້ແຈ້ງນາຍບ້ານ ເພື່ອຂໍເອກກະສານຢັ້ງຢືນເພື່ອ ອອກ-ເຂົ້າບ້ານ ຫລື ມີເອກະສານຢັ້ງຢືນຈາກຫ້ອງການ ເພີ່ມເຕີມຍິ່ງດີ.

ປະຊາຊົນບ້ານແດງ ທີ່ມີສວ່ນພົວພັນໃກ້ຊິດ ກັບຄົນຕິດເຊື້ອ ກໍຄວນໄດ້ກະກຽມທາມລາຍຂອງຕົນ ໃຫ້ຈະແຈ້ງ ແລະ ຖືກຕ້ອງ ເພື່ອການສອບສວນຂອງແພດ ຈະບໍ່ໃຊ້ເວລາຫລາຍ ຈາກນັ້ນ ກໍ່ຕຽມຄວາມພ້ອມ ເພື່ອໃຫ້ແພດເກັບຕົວຢ່າງໄປກວດ. ໃນຂະນະດຽວກັນ ກໍ່່ຕ້ອງແຍກຕົວຈາກຄົນອື່ນ ໃຫ້ຄົບ 2 ອາທິດ ເຖິງວ່າຈະໄດ້ຮັບການຢັ້ງຢືນການກວດວ່າເປັນຜົນລົບກໍ່ຕາມ.

ປະຊາຊົນບ້ານແດງ ທີ່ຍັງບໍ່ທັນໄດ້ສັກວັກຊີນ ກໍກຽມຕົວເອງ ເພື່ອແພດຈະໄດ້ເຄື່ອນທີ່ໄປສັກວັກຊິນຢູ່ກັບບ້ານເລີຍ.

ສໍາລັບຄອບຄົວຂອງຄົນຕິດເຊື້ອ ທີ່ຢູ່ບ້ານແດງ ຄວນໄດ້ທໍາຄວາມສະອາດ ແລະ ຂ້າເຊື້ອຢູ່ໃນເຮືອນຕົນເອງ, ໂດຍການເຊັດຖູດ້ວຍນໍ້າຢາຂ້າເຊື້ອ.

ໃນຈຸດທີ່ບໍ່ສາມາດເຊັດຖູໄດ້ ສາມາດສີດຜົ່ນຢາຂ້າເຊື້ອໄດ້ ແຕ່ສະມາຊິກທັງໝົດໃນຄອບຄົວ ຕ້ອງອອກມາລໍຖ້າຢູ່ເດີ່ນເຮືອນ ແລະ ລໍຖ້າຈົນກວ່າການສີດຜົ່ນນັ້ນ ເຫີຍແຫ້ງ ຈຶ່ງເຂົ້າໄປໃນເຮືອນ ເພື່ອຫຼີກເວັ້ນ ຜົນກະທົບຂອງຢາຂ້າເຊື້ອຕໍ່ຜິວໜັງ ແລະ ລະບົບຫາຍໃຈຂອງທຸກຄົນ.

ສ່ວນບ້ານແດງທີ່ຈະກາຍເປັນບ້ານເຫລືອງ ໃນເມື່ອການປະຕິບັດມາດຕະການປິດບ້ານໄດ້ຄົບ 14 ວັນ ແລະ ບໍ່ມີເຫດການແຜ່ເຊື້ອໃນບ້ານດັ່ງກ່າວໃນເວລາ 14 ວັນດັ່ງກ່າວ.

Related Posts

Leave a Reply

Your email address will not be published. Required fields are marked *