ແຂວງຫຼວງພະບາງຈູດທໍາລາຍຢາເສບຕິດ ເນື່ອງໃນວັນແຫ່ງຊາດຕ້ານຢາເສ ບຕິ ດ ແຂວງຫຼວງພະບາງ ໄດ້ຈັດພິທີຈູດທໍາລາຍຢາເສ ບຕິ ດ ທີ່ສານຕັດສິນໃຊ້ໄດ້ຢ່າງຂາດຕົວນໍາມາຈູດ ແລະ ທໍາລາຍເນື່ອງໃນວັນແຫ່ງຊາດຕ້ານຢາເສບຕິດຄົບຮອບ 20 ປີ ເຊິ່ງຈັດຂຶ້ນໃນວັນທີ 12 ຕຸລາ 2021 ນີ້ທີ່ເດີ່ນກິລາໂຮງຮຽນ ປກສ ຊັ້ນສູງເລກ 2 (ແກ້ງເບັນ) ໂດຍເປັນກຽດເຂົ້າຮ່ວມຂອງ ທ່ານ ຄໍາຂັນ ຈັນທະວີສຸກ ເຂົ້າແຂວງໆຫຼວງພະບາງ, ທ່ານ ພັທ ສົມບູນ ທະນາວັນ ຮອງກອງບັນຊາການ ປກສ ແຂວງ ຫົວໜ້າຫ້ອງຕຳຫຼວດ, ຜູ້ຊີ້ນຳວຽກງານຢາເສບຕິດ ແຂວງຫຼວງພະບາງ, ມີທ່ານຮອງເຈົ້າແຂວງ,ເຈົ້ານະຄອນຫຼວງພະບາງ ພ້ອມດ້ວຍແຂກຖືກເຊີນທີ່ກ່ຽວຂ້ອງເຂົ້າຮ່ວມ.

ທ່ານ ສອນນິຄົມ ຄຳພາສິດ ຮອງປະທານສານປະຊາຊົນແຂວງ ໄດ້ຂຶ້ນຜ່ານບົດສະຫຼຸບລາຍງານສະພາບການແກ້ໄຂຄະດີຢາເສບຕິດ ຊຶ່ງມີຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດແລ້ວ ຕໍ່ພິທີສະເຫຼີມ ສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 20 ປີ (12/10/2001-12/10/2021) ວ່າ: ປີ 2019-2020 ໄດ້ພ້ອມກັນຈັດຕັ້ງພິທີຈູດ ແລະທໍາລາຍຢາເສບຕິດເຊິ່ງປະກອບມີ ຢາເຮໂລອິນ 4.228 ກຣາມ, ຢາບ້າ 6.265 ກຣາມ, ມີຄະດີ 108 ເລື່ອງ, ມີນັກໂທດ 141 ຄົນ, ຍິງ 12 ຄົນ ແລະ ໃນປີ 2020-2021 ເຈົ້າໜ້າທີ່ ສາມາດມ້າງທະລາຍຄະດີຢາເສບຕິດ ໄດ້ທັງໝົດ 152 ເລື່ອງ, ມີຜູ້ຖືກຫາທັງໝົດ 223 ຄົນ, ຍິງ 15 ຄົນ, ໄດ້ສັ່ງຟ້ອງຂຶ້ນສານ ແລະມີຄຳຕັດສິນຂອງສານທີ່ໃຊ້ໄດ້ຢ່າງເດັດຂາດແລ້ວ ຈຳນວນ 119 ເລື່ອງ,

ມີນັກໂທດ ທັງໝົດ ຈຳນວນ 153 ຄົນ, ຍິງ 07 ຄົນ, ໃນນີ້ ມີນັກໂທດທີ່ຖືກສານຕັດສິນຕະຫຼອດຊີວິດ ຈໍານວນ 12 ຄົນ, ຍິງ 0 ຄົນ, ຂອງກາງມີຢາບ້າ ຈໍານວນ 95.516 ເມັດ,ເທົ່າກັບ 9.551,6 ກຣາມ, ຢາຝິ່ນ ຈຳນວນ 168,91 ກຣາມ, ເຮໂລອິນ 2,8 ກຣາມ, ອຸປະກອນການເສບ ແລະສິ່ງຫຸ້ມຫໍ່ຢາເສບຕິດຈຳນວນໜຶ່ງ. ສຳລັບຢາເສບຕິດ ທີ່ຈູດທໍາລາຍໃນຄັ້ງນີ້ ລວມມີ ຢາບ້າ, ກັນຊາແຫ້ງ, ຝຸ່ນຂາວ, ເຄື່ອງອຸປະກອນການເສບ ແລະສີ່ງຫຸ້ມຫໍ່ຈຳນວນໜຶ່ງ, ສ່ວນຢາຝິ່ນ ຈຳນວນ 168,91 ກຣາມ, ແມ່ນຈະບໍ່ໄດ້ທໍາລາຍ ເນື່ອງຈາກຈະໄດ້ນໍາໃຊ້ເຂົ້າໃນທາງດ້ານວິທະຍາສາດການແພດຕໍ່ໄປ.

ເຊິ່ງຂອງກາງຢາເສບຕິດທີ່ມີຄຳຕັດສິນຂອງສານທີ່ໃຊ້ໄດ້ຢ່າງເດັດຂາດແລ້ວ, ຍັງມີຂອງກາງຢາເສບຕິດ ແລະອຸປະກອນການຜະລິດຢາເສບຕິດຈຳນວນໜຶ່ງ ທີ່ພົບເຫັນຢູ່ໃນປ່າ, ຊຶ່ງບໍ່ສາມາດຮູ້ໄດ້ວ່າບຸກຄົນໃດເປັນເຈົ້າຂອງຢາເສບຕິດຈຳນວນດັ່ງກ່າວຢູ່ 03 ບ້ານຄື: ບ້ານໝາກຜຸກ, ບ້ານຊົງຈ່າ ແລະ ບ້ານຫຼັກ 50, ມີຢາເຮໂຣອິນ(ປະເພດຝຸ່ນ) ຈຳນວນ 83.750 ກິໂລກຼາມ, ຢາບ້າ (ປະເພດເມັດ)ຈຳນວນ 79.682 ກິໂລກຼາມ, ຢາບ້າ(ປະເພດຝຸ່ນ) ຈຳນວນ 129.64 ກິໂລກຼາມ, ຢາໄອ້ 12 ກິໂລກຣາມ ແລະ ຄ້າຍຄືຢາໄອ້ ຈຳນວນ 14,2 ກິໂລກຼາມ,

ນອກນັ້ນຍັງມີທາດເຄມີເພື່ອປະສົມຢາເສບຕິດ ຄື: ແປ້ງສີຂີ້ດິນ ຈຳນວນ 30,1 ກິໂລກຼາມ, ແປ້ງສີຟ້າ ຈໍານວນ 2 ກິໂລກຼາມ, ແປ້ງສີຂາວຈຳນວນ 395,1 ກິໂລກຼາມ, ນ້ຳຢາເຄມີ ຈໍານວນ 310,2 ກິໂລກຼາມ ແລະ 15 ແກ້ວ ກັບ 07 ແກັດ, ຫົວເຊື້ອຢາບ້າ ຈໍານວນ 28 ກິໂລກຼາມ, ສີປະສົມຢາ ຈຳນວນ 06 ກິໂລກຼາມ, ຖົງຢາງສໍາລັບໄວ້ບັນຈຸຢາ(ສີຟ້າ) ຈຳນວນ 52,4 ກິໂລກຼາມ, ຖົງຢາງສຳລັບໄວ້ຫຸ້ມຫໍ່ (ສີຂາວ) ຈຳນວນ 107,9 ກິໂລກຼາມ, ແກ່ນຝິ່ນ ຈໍານວນ 177,9 ກິໂລກຼາມ, ສ່ວນຢາຝິ່ນ 600 ກຼາມ ຈະບໍ່ໄດ້ທໍາລາຍ ເນື່ອງຈາກຈະໄດ້ນໍາໃຊ້ເຂົ້າທາງດ້ານວິທະຍາສາດການແພດ ແລະ ຖ້າທຽບໃສ່ປີຜ່ານມາ ຄະດີຄ້າ-ຂາຍຢາເສບຕິດແມ່ນມີທ່າອ່ຽງເພີ່ມຂຶ້ນ.

ພ້ອມນີ້ ທ່ານ ພັທ ສົມບູນ ທະນາວັນ ຮອງກອງບັນຊາການ ປກສ ແຂວງ ຫົວໜ້າຫ້ອງຕຳ ຫຼວດ, ຜູ້ຊີ້ນຳວຽກງານຢາເສບຕິດ ແຂວງຫຼວງພະບາງ, ຍັງໄດ້ຮຽກຮ້ອງມາຍັງພະນັກງານ, ທະຫານຕໍາຫຼວດ, ນັກທຸລະກິດ ພໍ່ຄ້າຊາວຂາຍ ຕະຫຼອດຮອດພໍ່ແມ່ປະຊາຊົນ ຈົ່ງຊ່ວຍເປັນຫູເປັນຕາ ຊ່ວຍເຈົ້າໜ້າທີ່ເພື່ອບໍ່ໃຫ້ມີຊ່ອງວ່າງສວຍໂອກາດຄ້າຂາຍສິ່ງເສບຕິດ ທີ່ເປັນໄພອັນຕະລາຍຕໍ່ສັງຄົມ, ເປັນສິ່ງເບື່ອເມົາເຮັດໃຫ້ສັງຄົມເກີດຄວາມສັບສົນວຸ້ນວາຍຍ້ອນຜິດຢາບ້າ, ເປັນສິ່ງກົດໝ່ວງຕໍ່ການພັດທະນາປະເທດຊາດ, ສະນັ້ນຫາກພົບເຫັນພວກທີ່ຄ້າຂາຍສິ່ງເສບຕິດ ສິ່ງຜິດກົດໝາຍແມ່ນໃຫ້ແຈ້ງເຈົ້າໜ້າທີ່ ເພື່ອຈະສະກັດກັ້ນບໍ່ໃຫ້ມີການລັກລອບຄ້າຂາຍ ແລະພ້ອມກັນກໍາຈັດໃຫ້ສິ້ນໄປຈາກສັງຄົມລາວ.

ຈາກນັ້ນທ່ານເຈົ້າແຂວງພ້ອມດ້ວຍຜູ້ເຂົ້າຮ່ວມໄດ້ພ້ອມກັນຈູດ ແລະ ທໍາລາຍຢາເສບຕິດຢ່າງເປັນທາງການ.

ຂ່າວ: ສີສຸວັນ

Related Posts

Leave a Reply

Your email address will not be published. Required fields are marked *