ຊົມເຊີຍ ວັນທີ 12 ຕຸລາ ວັນປະກາດເອກະລາດ ແລະ ວັນການທູດລາວ

ວັນທີ 12 ຕຸລາ 1945 ແມ່ນວັນປະກາດເອກະລາດຂອງ ປະເທດລາວ ເປັນວັນທີ່ປະຊາຊົນລາວບັນດາເຜົ່າໄດ້ກັບມາເປັນເຈົ້າຂອງປະເທດຊາດ ແລະ ກຳນົດຊະຕາກໍາດ້ວຍຕົນເອງ ພາຍຫຼັງທີ່ຕົກຢູ່ພາຍໃຕ້ການປົກຄອງຂອງຜູ້ຮຸກຮານຈາກພາຍນອກມາເປັນເວລາກວ່າຮ້ອຍປີ.

ວັນດັ່ງກ່າວ ແມ່ນໝາກຜົນຂອງການຮ່ວມກັນຕໍ່ສູ້ທາງດ້ານກຳລັງອາວຸດ ແລະ ແນວຄິດການເມືອງຂອງປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກກອມມູນິດອິນດູຈີນ ຄະນະພັກແຄວ້ນລາວ ໄດ້ນໍາພາປະຊາຊົນລາວຍຶດອຳນາດການປົກຄອງຢູ່ວຽງຈັນ ແລະ ຕໍ່ມາໄດ້ປະກາດໃຫ້ຊາວໂລກໄດ້ ຮັບຮູ້ເອກະລາດຄັ້ງທໍາອິດຂອງຊາດລາວ ເຊິ່ງໃນເນື້ອໃນດັ່ງກ່າວແມ່ນໄດ້ແຈ້ງກ່ຽວກັບການປ່ຽນແປງອໍານາດການປົກຄອງ ລຶບລ້າງສົນທິສັນຍາທີ່ບໍ່ເປັນທຳ ປະກາດໃຊ້ລັດຖະທຳມະນູນສະບັບຊົ່ວຄາວ ປະກາດໃຊ້ທຸງສາມສີ ແລະ ປະກາດສ້າງຕັ້ງລັດຖະບານຊົ່ວຄາວ ຈົນໃນທີ່ສຸດກໍ່ແມ່ນການຮັບຮູ້ປະເທດລາວໃນແຜນທີ່ໂລກ.

ໃນຂະນະດຽວກັນນັ້ນ, ວັນທີ 12 ຕຸລາ ແມ່ນຂີດໝາຍແຫ່ງການເລີ່ມຕົ້ນຂອງວຽກງານການຕ່າງປະເທດຂອງລາວ ເພາະນັບຕັ້ງແຕ່ການເຄື່ອນໄຫວຂອງລັດຖະບານຊົ່ວຄາວຕັ້ງແຕ່ຍຸກນັ້ນຈົນຮອດປະຈຸບັນ (ສະເດັດເຈົ້າສຸພານຸວົງໄດ້ຮັບການແຕ່ງຕັ້ງເປັນເສນາບໍດີ ລັດຖະມົນຕີວ່າການກະຊວງການຕ່າງປະເທດລາວຄົນທໍາອິດ) ວຽກງານຂະແໜງການຕ່າງປະເທດແມ່ນມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ.

ສະນັ້ນ, ໂດຍການຄົ້ນຄວ້າແລະ ສະເໜີຂອງກະຊວງການຕ່າງປະເທດ ຈຶ່ງໄດ້ມີໜັງສືແຈ້ງການຂອງກົມການເມືອງສູນກາງພັກ ສະບັບເລກທີ 230/ຫສພ, ລົງວັນທີ 19 ມິຖຸນາ 2013 ເຫັນດີກຳນົດເອົາວັນທີ 12 ຕຸລາ 1945 ເປັນວັນການທູດລາວຢ່າງເປັນທາງການ.

ຕະຫຼອດໄລຍະທີ່ຜ່ານມາ, ປະເທດລາວ ພາຍໃຕ້ການນຳພາຂອງພັກປະຊາຊົນປະຕິວັດລາວ ໄດ້ຍົກສູງວຽກງານການຕ່າງປະເທດມາໂດຍຕະຫຼອດ ໂດຍຖຶກໝັ້ນແນວທາງການຕ່າງປະເທດ “ສັນຕິພາບ ເອກະລາດ ມິດຕະພາບ ແລະ ການຮ່ວມມື” ແລະ ປະຕິບັດນະໂຍບາຍເປີດກວ້າງການພົວພັນຮ່ວມມືແບບຫຼາຍທິດຫຼາຍຝ່າຍ ແລະ ຫຼາຍຮູບແບບ ຕາມທິດນໍາ ເພີ່ນມິດ ຫຼຸດຜ່ອນສັດຕູ ເຫັນໄດ້ຈາກການເຂົ້າເປັນສະມາຊິກຂອງກຸ່ມອົງການຈັດຕັ້ງ ໃນພາກພື້ນ ແລະ ສາກົນ ຈຳນວນຫຼາຍກວ່າ 130 ອົງການ.

ແຫຼ່ງຂໍ້ມູນ: ຫ້ອງວ່າການລັດຖະບານ.

Related Posts

Leave a Reply

Your email address will not be published. Required fields are marked *