ການຄ້າແຂວງຄຳມ່ວນ ເອົາໃຈໃສ່ຕິດຕາມ ການຊື້- ຂາຍສິນຄ້າ ສະໜອງໃຫ້ແກ່ປະຊາຊົນ ໄລຍະປິດເມືອງ

ຂປລ. ທ່ານ ວຽງທອງ ພິມມະສອນ ຫົວໜ້າຂະແໜງການຄ້າພາຍໃນ ແລະ ໃນນາມຄະນະກອງເລຂາຮັບຜິດຊອບ ຊ່ວຍວຽກໃນການຕິດຕາມການຊື້-ຂາຍ ພາຍໃນ 3 ເຂດເທສະບານໃນໄລຍະປິດເມືອງທ່າແຂກ ໄດ້ໃຫ້ສຳພາດຕໍ່ສື່ມວນຊົນຂອງແຂວງໃນວັນທີ 24 ກັນຍາ ນີ້ວ່າ:

ຕາມທິດຊີ້ນຳຂອງຄະນະສະເພາະກິດຂັ້ນແຂວງ ເພື່ອບໍລິການຮັບໃຊ້ໃຫ້ປະຊາຊົນ ໄດ້ມີຄວາມສະດວກໃນການຊື້ສະບຽງອາຫານ ເປັນຕົ້ນ ຊີ້ນ, ປາ ແລະ ພືດຜັກຕ່າງໆ ໃນໄລຍະແຂວງຄຳມ່ວນ ໄດ້ປະຕິບັດມາດຕະການປ້ອງກັນໂຄ ວິດ-19 ນີ້, ພະແນກອຸດສາຫະກຳ ແລະ ການຄ້າແຂວງ ໄດ້ຮ່ວມກັບຂະແໜງການກ່ຽວຂ້ອງ ເປັນຕົ້ນ.

ເຈົ້າໜ້າທີ່ຕຳຫລວດ, ຂະແໜງກະສິກຳ, ສາທາລະນະສຸກ ເຄື່ອນໄຫວນຳພາຂະບວນລົດພໍ່ຄ້າ, ແມ່ຄ້າເປີດຂາຍສິນຄ້າ ຢູ່ຈຸດຕ່າງໆຕາມຄວາມເໝາະສົມ ເພື່ອຫລີກລ້ຽງຄວາມແອອັດ, ໃນນີ້ມີ 3 ເຂດຄື : ເຂດຈອມທອງ, ເຂດຈອມແຈ້ງ ແລະ ເຂດນາໂບ.

ໃນການລົງຊຸກຍູ້-ຕິດຕາມນີ້, ຜູ້ຂາຍຕ້ອງໄດ້ປະຕິບັດມາດຕະການປ້ອງກັນຢ່າງເຂັ້ມງວດ ເຊັ່ນ : ໃສ່ຜ້າອັດປາກ-ດັງ, ໃສ່ຖົງມືຕ່າງໆ, ຜູ້ຊື້ກໍ່ເຊັ່ນດຽວກັນ ຕ້ອງມີໃບສັກຢາຄົບໂດສ ເຈົ້າໜ້າທີ່ພວກເຮົາຈິ່ງອະນຸຍາດ, ພ້ອມທັງມີການເວັ້ນໄລຍະຫ່າງໃນການຈຳໜ່າຍ ແລະ ຈັດຊື້ສິນຄ້າຢູ່ແຕ່ລະສະຖານທີ່.

ສ່ວນລາຄາຂອງສິນຄ້າແມ່ນໄດ້ຂາຍຕາມລາຄາທີ່ລັດກຳນົດ ເປັນຕົ້ນ ລາຄາຊີ້ນງົວ, ຄວາຍ ແມ່ນຂ່າຍ 80.000- 85.000 ກີບ, ຊີ້ນໝູບໍ່ເກີນ 50.000 ກີບ ແລະ ໄຂ່ບໍ່ໃຫ້ເກີນ 40.000 ກີບ, ໃນການຂາຍນີ້ແມ່ນໄດ້ເລາະໄປຕາມບ້ານ ແລະ ຈະຢຸດຂາຍຕາມສະຖານທີ່ເໜາະສົມ ໂດຍເລີ່ມແຕ່ 8:00 ໂມງ ຫາ 17:00 ໂມງ.ໂອກາດນີ້,

ທ່ານ ວຽງທອງ ພິມມະສອນ ໄດ້ຮຽກຮ້ອງມາຍັງປະຊາຊົນທີ່ຕ້ອງ ການມາຊື້ອາຫານ ໃຫ້ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດເຊັ່ນ: ການຮັກສາໄລຍະຫ່າງ, ໃສ່ຜ້າອັດປາກ-ດັງ ແລະ ກໍລະນີຖ້າພົບເຫັນທາງຮ້ານໃດ, ບຸກຄົນໃດມີການລັກຊື້-ຂາຍສິນຄ້າທີ່ບໍ່ໄດ້ຮັບອະນຸຍາດ, ພົບເຫັນກໍລະນີຂາຍເກີນລາຄາທີ່ລັດກຳນົດໄວ້ ສາມາດແຈ້ງມາຍັງເຈົ້າໜ້າທີ່ພວກເຮົາໄດ້.

ສ່ວນການຂາຍຊີ້ນ- ຜັກຕ່າງໆ ຖ້າບໍ່ທ່ວງທັນ ຫລື ໝົດກ່ອນກໍຂໍອະໄພ ພວກເຮົາຈະນໍາສະເໜີຂັ້ນເທິງໂດຍໄວ ເພື່ອນຳໄປຂາຍໃນບ້ານຕໍ່ໆໄປ, ນອກຈາກການຂາຍສິນຄ້າທີ່ກ່າວມານັ້ນ, ພວກເຮົາຍັງມີລົດສິນຄ້າຂອງບໍລິສັດ ຊີພີ ຕື່ມອີກ.

ຂ່າວ : ມະນີວັນ

Related Posts

Leave a Reply

Your email address will not be published. Required fields are marked *