ເຈົ້າແຂວງຫົວພັນ​ ອອກແຈ້ງການແນະນຳສຳລັບມາດຕະການຫ້າມ ແລະ ຜ່ອນຜັນ

ເຈົ້າແຂວງຫົວພັນ​ ອອກແຈ້ງການແນະນຳສຳລັບມາດຕະການຫ້າມ ແລະ ຜ່ອນຜັນ​ ປ້ອງກັນການລະບາດຂອງພະຍາດໂຄວິດ-19​ ແມ່ນໃຫ້ສືບຕໍ່ປະຕິບັດຕາມແຈ້ງການ ສະບັບເລກທີ 274/ຈຂ.ຫພ, ລົງວັນທີ 04/09/2021 ນອກຈາກນັ້ນແຂວງຍັງໄດ້ວາງບັນດາມາດຕະການເພີ່ມຕື່ມດັ່ງນີ້:

1. ປິດການຂົນສົ່ງລົດໂດຍສານ ແລະ ສາຍການບິນໂດຍສານ ເຂົ້າແຂວງຫົວພັນ.

2. ສຳລັບພະນັກງານລັດຖະກອນ, ທະຫານ, ຕຳຫຼວດ, ພະນັກງານບໍລິສັດ, ອົງການຕ່າງໆ ທີ່ມີຄວາມຈຳເປັນ ແທ້ໆທີ່ຈະເດີນທາງເຂົ້າ-ອອກແຂວງຫົວພັນໃນໄລຍະນີ້ ແມ່ນຈະຕ້ອງໄດ້ປະຕິບັດຕາມມາດຕະການດັ່ງນີ້:

ສຳລັບບຸກຄົນທີ່ໄດ້ສັກຢາວັກຊິນຄົບ 2 ໂດສຕາມຊະນິດວັກຊິນ ແລະ ເດີນທາງມາຈາກເຂດບ້ານສີຂຽວ ແມ່ນຕ້ອງໄດ້ກັກຕົວຢູ່ສູນກັກກັນຂອງຄະນະສະເພາະກິດກຳນົດໄວ້ ເປັນເວລາ 11 ວັນ.

ສຳລັບບຸກຄົນທີ່ ໄດ້ສັກຢາວັກຊິນບໍ່ຄົບໂດສ ຫຼື ຍັງບໍ່ໄດ້ສັກຢາວັກຊິນ ທີ່ເດີນທາງມາຈາກເຂດບ້ານສີແດງແມ່ນຕ້ອງໄດ້ກັກຕົວ ຢູ່ສູນກັກກັນຂອງຄະນະສະເພາະກິດກຳນົດໄວ້ເປັນເວລາ 21 ວັນ.

3. ລົດບັນທຸກສິນຄ້າ ທີ່ມີຈຸດປະສົງຈະເດີນທາງເຂົ້າມາແຂວງຫົວພັນ ຕ້ອງປະຕິບັດຕາມມາດຕະການດັ່ງນີ້:

ໃຫ້ຄ່ຽນຖ່າຍສິນຄ້າ ຫຼື ປ່ຽນໂຊເຟີລົດຢູ່ຈຸດກວດກາ ກ່ອນເຂົ້າແຂວງຫົວພັນ

4. ເຈົ້າຂອງພາຫະນະທີ່ນຳເອົາຜູ້ໂດຍສານ ຕິດຕາມມານໍາພາຫະນະຂອງຕົນ ແມ່ນຕ້ອງໄດ້ຮັບຜິດຊອບຄ່າສິ້ນເປືອງຕ່າງໆໃນການຕິດຕາມ ແລະ ນຳສົ່ງຜູ້ໂດຍສານ ໄປເຖິງປາຍທາງ ຄື: ອັດຕາກິນ 50.000 ກີບ x 3 ຄົນ / 1 ວັນ. ຄ່ານ້ຳມັນລົດ ຕາມໄລຍະທາງຕົວຈິງ. ອັດຕາຄິດໄລ່ແມ່ນ 7 ກິໂລແມັດ / 1 ລິດ.

5. ການເດີນທາງອອກໄປຕ່າງແຂວງຂອງພົນລະເມືອງແຂວງຫົວພັນ ແມ່ນຕ້ອງໄດ້ຮັບໃບອະນຸຍາດຈາກ ພະແນກສາທາລະນະສຸກແຂວງຫົວພັນສາກ່ອນ.

6. ຫ້າມຈັດງານບຸນປະເພນີ, ງານລ້ຽງ, ງານດອງ, ງານສ້າງສັນຕ່າງໆ ແລະ ກອງປະຊຸມ ເກີນຈຳນວນ 50 ຄົນ.

7. ປິດກິດຈະກຳການຫລິ້ນກິລາໃນຮົ່ມ ແລະ ກິລາທີ່ມີຜູ້ເຂົ້າຮ່ວມ, ຜູ້ຊົມເປັນຈຳນວນຫລາຍ.

8. ປິດຮ້ານບັນເທີງ, ຮ້ານຄາລາໂອເກະຕ່າງໆ.

9.​ ມາດຕະການຕໍ່ຜູ້ລະເມີດ ມີຄືດັ່ງນີ້:

ສຳລັບບຸກຄົນທີ່ໃຊ້ບໍລິການ ຫຼື ຜູ້ລະເມີດ:

– ຄັ້ງທີ 1: ຖືກກ່າວເຕືອນ ພ້ອມທັງຂຽນບົດບັນທຶກກັບເຈົ້າໜ້າທີ່ເພື່ອເປັນບ່ອນອີງໃນຕໍ່ໜ້າ.

– ຄັ້ງທີ 2: ປັບໄຫມ 100.000 ກີບ/ຄົນ/ຄັ້ງ ພ້ອມທັງຂຽນບົດບັນທຶກກັບເຈົ້າໜ້າທີ່ເພື່ອເປັນບ່ອນອີງໃນຕໍ່ໜ້າ.

– ຄັ້ງທີ 3: ປັບໄຫມ 300.000 ກີບ/ຄົນ/ຄັ້ງ ພ້ອມທັງຂຽນບົດບັນທຶກກັບເຈົ້າໜ້າທີ່ເພື່ອເປັນບ່ອນອີງໃນຕໍ່ໜ້າ.

– ຄັ້ງທີ 4: ປະຕິບັດ ຖອນໃບທະບຽນດຳເນີນທຸລະກິດ ແລະ ດຳເນີນຄະດີທາງອາຍາຕາມກົດໝາຍ.

ສຳລັບຜູ້ປະກອບການ (ບັນດາຮ້ານ, ບໍລິສັດ …)

– ຄັ້ງທີ 1: ຖືກກ່າວເຕືອນ ພ້ອມທັງຂຽນບົດບັນທຶກກັບເຈົ້າໜ້າທີ່ເພື່ອເປັນບ່ອນອີງໃນຕໍ່ໜ້າ.

– ຄັ້ງທີ 2: ປັບໄຫມ 1.000.000 ກີບ/ຄັ້ງ ພ້ອມທັງຂຽນບົດບັນທຶກກັບເຈົ້າໜ້າທີ່ເພື່ອເປັນບ່ອນອີງໃນຕໍ່ໜ້າ.

– ຄັ້ງທີ 3: ປັບໄຫມ 3.000.000 ກີບ/ຄັ້ງ ພ້ອມຖອນໃບທະບຽນດາເນີນທຸລະກິດ.

– ຄັ້ງທີ 4: ປະຕິບັດ ດຳເນີນຄະດີທາງກົດໝາຍ ອາຍາ.

ມາດຕະການ​ດັ່ງນີ້​ ແມ່ນເລີ່ມປະຕິບັດແຕ່ວັນທີ​ 19​ ກັນຍາ​ ຫາ​ 4​ ຕຸລາ​ 2021.

Related Posts

Leave a Reply

Your email address will not be published. Required fields are marked *