ນະຄອນຫລວງວຽງຈັນ ອອກຄຳສັ່ງຍົກລະດັບມາດຕະການ

ນະຄອນຫລວງວຽງຈັນ ອອກຄຳສັ່ງຍົກລະດັບມາດຕະການ ປ້ອງກັນ ການລະບາດພະຍາດໂຄວິດ-19 ໃຫ້ປະຕິບັດຢ່າງເຂັ້ມງວດ

ໃນວັນທີ 19 ກັນຍາ 2021 ຢູ່ກະຊວງສາທາລະນະສຸກ ທ່ານ ພູວົງ ວົງຄຳຊາວ ຮອງເຈົ້າຄອງ ນະຄອນຫລວງວຽງຈັນ, ໄດ້ຖະແຫລ່ງຂ່າວ ກ່ຽວກັບຄຳສັ່ງເລກທີ 016/ສພກ ຂອງເຈົ້າຄອງນະ ຄອນຫລວງວຽງຈັນ, ເຊິ່ງໄດ້ຮັບການເຫັນດີ ຈາກລັດຖະບານ ກໍຄື ຄະນະສະເພາະກິດຂັ້ນສູນກາງ ຕາມທີ່ລະບຸໄວ້ໃນແຈ້ງການ ສະບັບເລກທີ 1187/ຫສນຍ, ລົງວັນທີ 18 ກັນຍາ 2021. ສະນັ້ນ, ທ່ານ ເຈົ້າຄອງນະຄອນຫລວງວຽງຈັນ ຈຶ່ງໄດ້ອອກຄຳສັ່ງດັ່ງລຸ່ມນີ້:

1). ໃຫ້ພະແນກການ, ອົງການທຽບເທົ່າພະແນກ, ອົງການປົກຄອງເມືອງ ແລະ ບ້ານ ຈົ່ງເພີ່ມທະວີການໂຄສະນາເຜີຍແຜ່ໃຫ້ປະຊາຊົນທຸກຄົນ ໄດ້ຮັບຮູ້ເຖິງໄພອັນຕະລາຍຂອງພະຍາດໂຄວິດ-19, ໃຫ້ຮູ້ຈັກປ້ອງກັນປະຍາດນີ້ດ້ວຍໂຕເອງ ຢ່າງຖືກຕ້ອງ ແລະ ເຂັ້ມງວດ.

2). ໃຫ້ພະນັກງານ-ລັດຖະກອນ, ວິສາຫະກິດ, ອົງການຈັດຕັ້ງສາກົນ ຢຸດການມາເຮັດວຽກຢູ່ຫ້ອງການ ນັບແຕ່ ວັນທີ 20 ຫາ 30 ກັນຍາ 2021, ຍົກເວັ້ນທະຫານ, ຕຳຫລວດ, ເຈົ້າໜ້າທີ່ດັບເພິງ, ແພດໝໍ, ພະນັກງານ, ອາສາສະໝັກ ຮັບຜິດຊອບລະບົບການບໍລິການໄຟຟ້າ, ນໍ້າປະປາ, ການສື່ສານ ແລະ ເຮັດວຽກສະກັດກັ້ນ, ການລະບາດ, ຄວບຄຸມ ແລະ ປິ່ນປົ່ວຜູ້ຕິດເຊື້ອພະຍາດ.

3). ຫ້າມປະຊາຊົນທຸກຄົນອອກຈາກເຮືອນ ຫລື ທີ່ພັກອາໄສ ເດີ່ນທາງໄປ-ມາ ຢູ່ນະຄອນຫລວງວຽງຈັນ ຍົກເວັ້ນກໍລະນີຈຳເປັນ ເຊັ່ນ: ໄປຊື້ອາຫານ, ໄປຊື້ຢາປົ່ວພະຍາດ, ໄປໂຮງໝໍ, ໄປປະຕິບັດໜ້າທີ່ທີ່ລະບຸໄວ້ໃນຂໍ້ທີ 14 ຂອງສະບັບນີ້ ແລະ ໄປປະຕິບັດໜ້າທີ່ຕາມການມອບໝາຍຂອງກສນຈັດຕັ້ງ.

4). ຫ້າທບຸກຄົນ, ລົດຂົ່ນສົ່ງໂດຍສານ ຢູ່ນະຄອນຫລວງວຽງຈັນ ເດີ່ນທາງໄປຕ່າງແຂວງ ຫລື ເຂດທີ່ມີການຕິດເຊື້ອ, ເຂດທີ່ມີຄວາມສຽງ ຍົກເວັ້ນທີ່ໄດ້ຮັບອະນຸຍາດຈາກ ຄະນະສະເພາະກິດຂັ້ນສູນກາງ ຫລື ນະຄອນຫລວງວຽງຈັນ.

5). ຫ້າມບຸກຄົນທີ່ຢູ່ໃນແຂວງ ທີ່ມີການລະບາດໃນຊຸມຊົນ ເຂົ້າມານະຄອນຫລວງວຽງຈັນ, ຖ້າຈຳເປັນຕ້ອງເຂົ້າມາ ຕ້ອງຈຳກັດບໍລິເວນ 14 ມື້ ຢູ່ສູນ ຫລື ໂຮງແຮມຈໍາກັດບໍລິເວນ ທີ່ຄະນະສະເພາະກິດນະຄອນຫລວງກຳນົດໄວ້ ແລະ ຕ້ອງຮັບຜິດຊອບຄ່າໃຊ້ຈ່າຍທັງໝົດດ້ວຍຕົນເອງ, ໃຫ້ເຈົ້າໜ້າທີ່ ປກສ ຕັ້ງດ້ານກວດກາເອກະສານ, ຂໍ້ມູນ ແລະ ສະກັດກັ້ນ ຜູ້ທີ່ບໍ່ໄດ້ຮັບອະນຸຍາດເດີ່ນທາງເຂົ້ານະຄອນ ຫລວງຢ່າງເດັດຂາດ.

6). ຫ້າມຜູ້ທີ່ຕິດເຊື້ອ ຫລື ສຳພັດໃກ້ຊິດກັບຜູ້ຕິດເຊື້ອປິດອຳ, ຕົວະປະຫວັດການເຄື່ອນໄຫວຂອງຕົນເອງຢ່າງເດັດຂາດ ແລະ ຫ້າມຫລົບໜີການເຂົ້າປິ່ນປົ່ວຢູ່ໂຮງໝໍ ຫລື ສະຖານທີ່ຈຳກັດບໍລິເວນ ຕາມຄຳສັ່ງຂອງແພດໝໍ ແລະ ຄຳສັ່ງຂອງຄະນະສະເພາະກິດຢ່າງເດັດຂາດ.

7). ຫ້າມຈັດປະຊຸມ, ໂຮມຊຸມນຸມ ແລະ ກິດຈະກຳຕ່າງໆ ທຸກຮູບແບບຕາມຄຳແນະນຳຂອງຄະນະສະເພາະກິດ ສະບັບເລກທີ 4291/ສພກ, ລົງວັນທີ 15 ກັນຍາ 2021.

8) ປິດດ່ານບ້ານໂດນ ເມືອງປາກງື່ມ, ດ່ານທ່າເດື່ອ ເມືອງຫາກຊາຍຟອງ, ດ່ານໜອງດາ ເມືອງສີໂຄດຕະບອງ ແລະ ດ່ານໂຄກແຫ່ ເມືອງສັງທອງ ຢ່າງເຂັ້ມງວດ. ສຳລັບດ່ານສາກົນ ຂົວມິດຕະພາບ ລາວ-ໄທ 1 ນະຄອນຫລວງວຽງຈັນ ແມ່ນປິດການເຂົ້າ-ອອກ ຂອງບຸກຄົນທົ່ວໄປ.

9) ປິດສະຖານທີ່ບັນເທິງ, ຮ້ານຄາຣາໂອເກະ, ຄາຊີໂນ, ຮ້ານອິນເຕີເນັດຄາເຟ, ຮ້ານເກມ, ໂຮງສາຍຮູບເງົາ, ຮ້ານສະນຸກເກີ, ຮ້ານນວດ, ຮ້ານສະປາ, ຮ້ານເສີມສວຍ, ສູນການຄ້າ, ຕະຫລາດກາງຄືນ, ປິດສວນອາຫານ, ແຫລ່ງທ່ອງທ່ຽວ, ເຮືອນພັກ, ລິສອດ, ຮ້ານກິນດື່ມ, ຮ້ານປະເພດປີ້ງຕ່າງໆທີ່ມີການບໍລິການເຄື່ອງດື່ມທາດເຫລົ້າ ແລະ ຂາຍເຄື່ອງຊະຊາຍຕາມແຄມທາງ ເຊັ່ນ: ການຂາຍຫວຍ, ເຄື່ອງຂອງ ແລະ ອາຫາ.

10). ຫ້າມໄປອອກກຳລັງກາຍກາງແຈ້ງ ຕາມສະຖານທີ່ສາທາລະນະ ເຊັ່ນ: ສະບຶງທາດຫລວງ, ສວນເຈົ້າອານຸວົງ ແລະ ປິດສູນກິລາໃນຮົ່ມຕ່າງໆ.

11). ປິດໂຮງງານຕັດຫຍິບ, ໂຮງງານອື່ນໆ ແລະ ໂຮງງານໃຫຍ່ ເພື່ອປະເມີນຄວາມສ່ຽງ, ຖ້າຮັບປະກັນໄດ້ວ່າບໍ່ມີຄວາມສ່ຽງ ຕໍ່ການແຜ່ລະບາດຂອງພະຍາດໂຄວິດ-19 ຈຶ່ງຈະພິຈາລະນາອະນຸຍາດໃຫ້ເປີດໂຮງງານຄືນ.

12). ຫ້າມກັກຕຸນ ແລະ ຂຶ້ນລາຄາສິນຄ້າທີ່ຈຳເປັນ, ໃຫ້ເຈົ້າໜ້າທີ່ກວດກາ ການຄ້າເອົາໃຈໃສ່ເປັນພິເສດ.

13). ຫ້າມສົ່ງຕໍ່ ຫລື ເຜີຍແຜ່ຂໍ້ມູນຂ່າວສານທີ່ບໍ່ມີມູນຄວາມຈິງ ໃນຮູບແບບໃດໜຶ່ງ ຜ່ານສື່ຕ່າງໆ ເຊິ່ງເຮັດໃຫ້ເຫີດມີຄວາມເຂົ້າໃຈຜິດ, ສ້າງຄວາມແຕກຕື່ນ ແລະ ສົ່ງຜົນກະທົບທາງລົບຕໍ່ສັງຄົມ.

14) ອະນຸຍາດໃຫ້ເປີດການຊື້-ຂາຍ ເຄື່ອງອຸປະໂພກ-ບໍລິໂພກ ດ້ວຍການຈັດຊື້-ຈັດສົ່ງ ແລະ ຮັບເອົາ ທີ່ຮັບປະກັນປ້ອງກັນການແຜ່ເຊື້ອພະຍາດໄດ້ ແລະ ອະນຸຍາດໃຫ້ເປີດກິດຈະການ ທີ່ມີຄວາມຈຳ ເປັນອື່ນໆ ເຊັ່ນ: ທະນາຄານ, ສະຖາບັນການເງິນທີ່ບໍແມ່ນທະນາຄານ, ໂຮງໝໍ, ຫ້ອງກວດພະຍາດເອກະຊົນ, ຮ້ານຂາຍຢາ, ກິດຈະກຳໄປສະນີ, ໂທລະຄົມມະນາຄົມ, ໄຟຟ້າ, ນ້ຳປະປາ, ປ້ຳນ້ຳມັນ ແລະ ການບໍລິການເກັບມ້ຽນຂີ້ເຫຍື້ອ.

15). ໃຫ້ຄະນະສະເພາະກິດນະຄອນຫລວງວຽງຈັນ, ເມືອງ ເພີ່ມທະວີປະຕິບັດບົດບາດສິດ ແລະ ໜ້າທີ່ຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ.

16). ໃຫ້ຫ້ອງການ ປກຊ-ປກສ ນະຄອນຫລວງວຽງຈັນ ສົມທົບກັບອົງການປົກຄອງເມືອງຕິດ ຕາມກວດກາ ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ.

17). ມາດຕະການຕໍ່ຜູ້ລະເມີດບຸກຄົນ ຫລື ນິຕິບຸກຄົນ ທີ່ລະເມີດມາດຕະການຂອງຄະນະສະ ເພາະກິດຂັ້ນສູນກາງ, ນະຄອນຫລວງ ແລະ ຄຳສັ່ງສະບັບນີ້ ຕ້ອງຖືກປັບໄໝຢ່າງເຂັ້ມງວດ ແລະ ເດັດ ຂາດດັ່ງນີ້: ບຸກຄົນລະເມີດປັບໄໝ 3.000.000 ກີບ/ຄົນ/ຄັ້ງ; ສຳລັບນິຕິບຸກຄົນ ປັບໄໝ 10.000.0000 ກີບ/ນິຕິບຸກຄົນ/ຄັ້ງ, ມອບໃຫ້ກຳລັງ ປກສ ສົມທົບກັບພາກສ່ວນກ່ຽວຂ້ອງຕິດຕາມກວດການ ໂດຍເລີ່ມຈາກການປັບໄໝ, ສັ່ງໂຈະ ຫລື ສັ່ງປິດກິດຈະການ ແລະ ກ້າວໄປເຖິງດຳເນີນຄະດີຕາມກົດໝາຍ.

ຂ່າວ-ພາບ: ສຸກສະຫວັດ ສົມສະໜິດ

Related Posts

Leave a Reply

Your email address will not be published. Required fields are marked *