ກະຊວງການເງິນ ຫາລືວຽກງານຮີບດ່ວນຕິດພັນກັບ ວາລະແຫ່ງຊາດ

ຂປລ.ໃນວັນທີ 13 ກັນຍາ 2021 ທີ່ຫ້ອງປະຊຸມໃຫຍ່ກົມສ່ວຍສາອາກອນ ກະຊວງການເງິນ, ໄດ້ຈັດກອງປະຊຸມປຶກສາຫາລືວຽກງານທີ່ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະວຽກງານຕ້ານການຮົ່ວໄຫລດ້ານລາຍຮັບ, ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການເງິນ, ມີ ທ່ານຮອງລັດຖະມົນຕີກະຊວງການເງິນ, ບັນດາຫົວໜ້າກົມ, ຮອງຫົວໜ້າກົມ ເຂົ້າຮ່ວມ.

ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການເງິນ ໄດ້ມີຄຳເຫັນຊີ້ນໍາວ່າ:ກອງປະຊຸມດັ່ງກ່າວ, ເປັນການປຶກສາຫາລືວຽກງານທີ່ຕິພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ,

ຊຶ່ງເປັນການປຶກສາຫາລືແບ່ງຄວາມຮັບຜິດຊອບແຕ່ລະຂົງເຂດໄດ້ຄົ້ນຄວ້າເຊື່ອມຊຶມໃຫ້ທົ່ວເຖິງ, ພ້ອມກັນເອົາໃຈໃສ່ຈັດຕັ້ງປະຕິບັດ ຕາມແຜນການດໍາເນີນງານຂອງບັນດາກົມ, ເອົາໃຈໃສ່ແບບແຜນວິທີການເຮັດວຽກ, ຄະນະກົມເພີ່ມທະວີການແກ້ໄຂຄວາມຫຍຸ້ງ ຍາກທາງດ້ານເສດຖະກິດ-ການເງິນ.

ຄຽງຄູ່ກັນນີ້, ຕ້ອງຜັນຂະຫຍາຍເປັນມາດຕະການອັນລະອຽດ ໃນແຕ່ລະບັນຫາແຕ່ລະຂອດວຽກງານຕາມຄວາມຮັບຜິດຊອບຂອງຕົນ ບົນພື້ນຖານການຕັດສິນໃຈ, ຕ້ອງມີຄວາມເສຍສະຫລະເພື່ອຊາດເພື່ອປະໂຫຍດຂອງປະຊາຊົນ, ຕ້ອງຫັນສູ່ການລົງເລິກເຮັດວຽກຫລາຍກວ່າເກົ່າ,

ຍຸດຕິການຟຸມເຟືອຍ, ອົດທົນຜ່ານຜ່າຄວາມຫຍຸ້ງຍາກ, ເອົາໃຈໃສ່ຊຸກຍູ້ຕິດຕາມກວດກາການປະເມີນຜົນຖອດຖອນບົດຮຽນເປັນປົກກະຕິ, ສະກັດກັ້ນການແກ້ໄຂທຸກປະກົດການຫຍໍ້ທໍ້ຂອງຂະແໜງການເງິນ.

Related Posts

Leave a Reply

Your email address will not be published. Required fields are marked *